Hæ hó.  Ef einhver skildi enn detta inn á þessa síðu er ég fluttur með bloggið mitt.

Ný slóð:  http://maggimark.blog.is

Hlakka til að sjá sem flesta, ætla að reyna að vera duglegur......

Maggi.

Hæhó.

Flottur dagur í gær, þriðjudag.  Fyrst ber að nefna að núna er loksins mætt til mín starfslið, deildarstjórarnir mættu til vinnu í gær, hver öðrum ferskari og við bara lögð fínt af stað inn í skólaárið.  Almennt starfsfólk mætir 10.ágúst, kennararnir 15.ágúst og krakkarnir 22.ágúst.  Spennó.

Svo fór fjölskyldan í hvalaskoðun frá Ólafsvík.  Verð bara að viðurkenna það að þetta kom mér verulega á óvart, bara ein skemmtilegasta lífsreynsla sem ég hef náð mér í.  Sáum höfrunga að leik og síðan eltumst við við hrefnu, sem er afar feiminn hvalur, enda oft verið að reyna að veiða hana.

Svo kom skyndilega tilkynning í hátalarakerfið, "blástur framundan".  Siglt var út í ballarhaf og eftir 20 mínútna þrúgandi þögn á dekkinu og einstaka augnathygli sást stór sporður sem var svo eltur, þar til að við sáum gríðarstóran búrhval rétt hjá okkur, næst komumst við ca. 5 metra, þegar skepnan lyfti sér ofarlega í hafflötinn og veifaði okkur með sporðinum.  Fjögurra tíma sigling, öll fjölskyldan.  FRÁBÆRT. 

Að tillögu Steinars hér á síðunni í kommentum er ég viss um að ég prófa sjóstöng hér fljótlega, hrottaskemmtilegt að standa svona á sjónum - ef ég hefði ekki verið svo heppinn að finna mér ævistarf sem mér finnst skemmtilegt hefði ég örugglega skellt mér á sjóinn.  Þú ert einhvern veginn svo algerlega tengdur þér á sjó. Allavega ég.

Skrifstofan að taka á sig mynd, en því miður hefur orðið enn töf á húsinu okkar, enn á Gufuskálum, það eina neikvæða hér, sem þarf að fara að útrýma.

Halló allir.

Jæja, flott Verslunarmannahelgi yfirstaðin og vinnan hafin á fullum krafti.  Fimmtudagurinn var bara látinn líða heimavið, á Gufuskálum og í Ólafsvík.  Ég varð ansi lasinn uppúr miðjum degi, slappleiki sem stóð fram á föstudagsmorgunn.  Sigga og Ölli komu þann dag og við stormuðum í Stykkishólm, löbbuðum um gamla bæinn og fengum okkur ís.  Á leiðinni heim komum við við í Bjarnarhöfn og fórum hlaðin hákarli og reyktum rauðmaga. 

Laugardagurinn var svo á sunnanverðu nesinu, fyrst á Djúpalónssandi, svo á Hellnum og þá að Búðum.  Við Hekla fórum í Lýsuhólslaugina, sem er heljar upplifun, enda úr ölkelduvatni.

Sunnudaginn fóru Stjáni og Laugi heim.  Við lágum lengi á meltunni en fórum svo í frábæra fjöruferð með Sigríði og Heklu.  Náttúran í sinni flottustu mynd, stórkostlegt veður og frábær fjara.

Mánudaginn tókum við svo á Grundarfirði og í slökun á Gufuskálum.

Frábær helgi, en nú er gleðin trufluð af vinnu, þó ætlum við í hvalaskoðun í dag, svona til að hafa prófað sjóinn í Breiðafirðinum líka.....

Maggi.

Halló.

Jæja, fyrsti pistill af Vesturlandinu, nánar tiltekið úr Ólafsvíkinni, af nýju skrifstofunni.  Því miður er enn verið að vinna í húsinu, þannig að reikna má með því að við komumst ekki inn í það fyrr en eftir helgi.  Á meðan á því stendur erum við staðsett í starfsmannaíbúð á Gufuskálum, mega stuð!

Hekla kom í gær og Thelma kemur í dag, fjölskyldan nær vonandi einhverjum dögum í húsinu áður en allir byrja í skólum.  Stjáni og Laugi komu í Verslunarmannahelgarfrí í gærkvöldi og verða fram á sunnudag, meiningin að finna skásta veðrið sem boðið verður uppá á Nesinu, borða góðan mat, snæða og spjalla.  Skemmtilegt!

Meira seinna.

Hæhæ.

Jæja, smám saman að læra betur og betur að njóta mín svona fótboltalaust.  Hef reyndar fengið að fljóta með Stjána karlinum á æfingar og leiki Keflavíkur og kann vel við það, strákurinn að gera skemmtilega hluti suður með sjó.

Annars hefur fjölskyldan fengið að sjá mun meira af mér en vanalega og ég er voðalega glaður með það að drottningarnar mínar allar fjórar hafa lýst ánægju sinni með það!  Helga og Sigríður Birta komu sólbrúnar og sætar heim á miðvikudaginn í faðm okkar hinna.  Meðan þær voru úti fór ég með Thelmu og Heklu í sumarbústaðinn hans pabba í Ráðleysu, fékk mikla slökun út úr því, ásamt því að borða dásamlegt hrefnuket og flottan ís á þeim magnaða stað Þingvöllum.

Síðustu dagar hafa farið í tékklistann vegna flutninganna, sennilega tínum við inn í gáminn núna snemma í næstu viku, ætlum reyndar að kíkja vestur á þriðju- og miðvikudag, gista á Gufuskálum og kíkja á byggingarframkvæmdir, líta á skrifstofuna mína og taka síðasta tékk fyrir endanlegan flutning.  Hlakka MIKIÐ til!

Nú eru bara 10 dagar þar til ég byrja að vinna, svo ekki seinna vænna en að fara að koma sér á staðinn!

Annars er svo búið að ákveða ferð á Strandir í ágúst svo að lokum verður þetta sumar nú eitt það besta í sögunni minni þegar allt kemur til alls.....

Þakka Siggu, Erlu og Brynjari kommentin.  Binni minn, það er búið að ráða allt í vetur, en ekki að spyrja að áhuga skólastjórans að fá þig vestur næsta haust!  Hefði virkilega haft gaman af því að hitta uppáhaldsbekkinn og árganginn, en því miður tókst það ekki, vonandi skemmtuð þið ykkur afar vel.  Takk sömuleiðis Erla mín, gaman að hitta þig sömuleiðis, alveg með ólíkindum hvað hefur ræst úr þessum villingahópi, orðin glæsilegt og þroskað fólk......eða???

Jæja, nóg í bili....

Jæja.

Smá ritstífla á meðan að erfiður tími í mínu sinni leið yfir.  Tók ákvörðun á þriðjudagskvöld og miðvikudagsmorgun að hætta að þjálfa uppáhaldsstrákana mína í meistaraflokki ÍR.

Gekk frá starfslokum í gær og fór svo og kvaddi menn á æfingunni í gærkvöldi. Drulludjöfullerfitt, en er bara tómur í dag....

Óskaplega glaður að geta dembt mér útí í skemmtilegt verk - að byrja að skipuleggja skólastarfið í góðum skóla á glæsilegum stað með góðu fólki.  Sannfærður um að Snæfellsnesið og Snæfellingar byggja upp eilítið bogið sjálfstraust.

Hvað þá fjölskyldan mín frábæra sem bakkar mig upp og knúsar enn meira nú en áður.  Helga og SBM gerðu það af krafti fyrir Spánarför í gær og nú, auk draumanna tveggja, Heklu og Thelmu er mamma komin.  Drífa og Öddi náttúrulega að eltast við hana, pabbi og Gulla, afi og amma stutt undan. Þar með er maður umkringdur öllum sem maður elskar mest.  Það er gott á svona tímapunkti.

Verst að hafa Jonna Mourinho ekki nálægt, hann duglegur bakhjarl frændans í gegnum tíðina. Veit hann er að hugsa til mín.

Þá er þessum kafla lokið í bili.  Nú kemur í ljós hvort þjálfunartímabilinu í mínu lífi er endanlega lokið eða hvort ég fer aftur af stað seinna.  Í augnablikinu sé ég ekki margt í spilunum sem ýtir mér aftur af stað.....

Hins vegar hef ég lært í lífinu að segja aldrei aldrei.  Í kvöld ætla ég að fara til Keflavíkur og horfa á vini mína stjórna leik Keflavíkur og ÍBV.  Njóta þess að horfa á fótbolta sem sannur áhugamaður án tengsla við eitt eða neitt.

Svo fer maður að drífa sig vestur, í augnablikinu er hreinlega erfitt að keyra Breiðholtsbrautina, langar mikið að gleyma mér við að horfa út á Breiðafjörðinn og uppá Snæfellsjökulinn.  Ef það að vera í slíku umhverfi með fólkinu sem maður elskar mest lagar ekki málin, á maður bara að láta skjóta sér út í geim og vinna á Sajud 7 fram að ævilokum.

Maggi í alvöru sumarfríi.

Jæja.

Fjölskyldan orðin róleg varðandi verðlaun á HM.  Fyrst var það Helga sem varð fyrir vonbrigðum þegar Ítalir slógu Þjóðverjana út og í gær var það stútfull stofa í Lækjarfitinni sem varð að sætta sig við að Portúgal tapaði fyrir 7 varnarmönnum, Zidane, Henry og Ribery.

Eftir skelfilega fordóma í lýsingu Harðar kom þó í ljós að hann hafði orðið sér að fífli þegar hann sagði Portúgal ekki hafa náð tökum á leiknum, tölfræðin leiddi það í ljós.  59% með boltann og 12 skot að marki gegn 5 Portúgölunum í vil.  Mikið óstjórnlega er ég ósáttur við umfjöllun Sýnar.  Einfaldlega ekki nægilega góðir þulir á leikjum og heimsóknirnar í sófann á leikjum hreint ömurlegar.  2 áhugamenn sem yfirleitt hafa ekki leikið knattspyrnu flissa og tala um enska boltann þann litla tíma sem ekki er verið að skjóta inn auglýsingum.

RÚV getur ekki verið verra 2010.  Það er ljóst.

Allavega, afslöppuð fjölskylda á sunnudaginn.  Að íhuguðu máli ákváðum við hjónaleysin að sameinast um Ítali sem betri kost.  Nenna að sækja og virka sem lið.  Frakkarnir hlógu að okkur á Laugardalsvellinum haustið ´98 fyrir leik.  Nú skulu þeir fá það borgað..........

Já, nú loksins skilur maður almennilega þegar rætt er um sunnlensk rigningarsumur!  Eftir ágæt sumur undanfarin ár held ég að við höfum alveg leyfi til að grenja undan veðurfari undanfarinna vikna.

10 - 12 stiga hiti, dumbungur gola og úrkoma.  Ekki alveg það sem vonir manns stóðu til - en vissulega er ennþá tími til að hlutir lagist, júlí og ágúst vonandi hressari og heitari.

Annars var þögnin undanfarna daga í samræmi við erfiða íþróttahelgi, þó ætla ég nú ekki að rabba um hana hér.  Það er að baki og framundan er undanúrslitavika á HM þar sem mitt lið Portúgalir hafa náð ótrúlega langt, rækilega reknir áfram af stórleik Luis Figo, sem ásamt Zinedine Zidane er að mínu mati besti leikmaður keppninnar hingað til.

Gaman að því!  Svo endar vikan á leik við vini mína úr KS/Leiftri í Mjóddinni.  Verður skemmtilegt!

Fjölskyldan hress, mamma rabbaði við okkur í gær, orðin spennt að koma og við spennt að fá hana.  Meira af því síðar.  Sigurjónarnir vinir okkar báðir í bústöðum þessa viku, planið að kíkja á þá núna næstu daga, látum frétta af því.

Já mín kæru, nú er sko bara gefið út dagblað í Lækjarfitinni!

Ætlaði að fara að vinna í morgun, en það frestaðist til seinni parts, þannig að óvíst verður hvort maður nær Þýskaland - Argentína.  Sosum hræðileg örlög sem bíða mín, Helga Lind búin að bjóða Klöru vinkonu sinni að koma og "HVETJA ÞÝSKALAND" á mínu heimili í dag.  Spáið nú í það!

Svo er kveðjuathöfn fyrir SBM á Sjálandi í dag, verður skrýtið.... enn eitt official goodbye receptionið!

Þá síðasta æfing fyrir Völsungsleik, svo þarf að spá í hvort ég sæki stelpurnar eftir æfinguna, eða hvort ég geri það eftir leik á morgun.

Endalaust action og fjör í rokinu og rigningunni.  Bendi hér fólki á lýsandi dæmi, eftir æfingu í gær var kíkt á Selfoss að horfa á leik í 2.deild.  Kom heim kl. 23 til að kyssa konuna góða nótt.  Sönnun?

Ekki málið......

http://www.fotbolti.net/fullStory.php?id=36799?&flash=true

Huggulegir þjálfarar ÍR neðarlega á síðunni..... Að lokum leiðrétting, heimilisfangið á Hellissandi er að sjálfsögðu SELhóll, en ekki Snæhóll....

Aftur fljótlega, koma með Tékk-inn komment!

Júhú!

Hjólið vígt þetta sumarið í gær.  Frábær ferðamáti, við Birta stormuðum um Garðabæ og Kópavog í um klukkutíma í gær.  Þegar við komum heim var mín kona hundsúr, vildi ekki koma inn og loksins þegar það tókst neitaði hún að taka af sér hjálminn!!!! Skapið kemur frá mömmunni, bara svo að það sé á hreinu......

Skemmtileg æfing í gær og svo bara sjónvarpshangs.  Fór með Birtu á hjólinu í leikskólann á morgun og svo rennur dagurinn í fótboltamál.  Fyrst þarf ég að hitta Braga út af alls konar leikmannamálum, svo æfing og svo skreppur á Selfoss til að sjá Selfoss spila við Reyni......

Stelpurnar gömlu koma svo á morgun til að vera hjá okkur fram í ágúst, svo kemur mamma og Lucy með henni 11.júlí.  Flott sumar, hvað þá þegar farið verður í það að raða inn í Snæhól 2......´

Jæja, jæja, jæja.......

Svei mér þá.  Ætla að gera tilraun til að blogga núna smá reglulega, vona að einhverjir nenni ennþá að líta hingað inn annað slagið á meðan, væri ágætt að fá komment um það!

Annars, er að klára Breiðholtsskólann og byrjaður að undirbúa skólann í Snæfellsbænum, hlakka gríðarlega til.  Enn er þó ekki komin endanleg dagsetning á flutningana - en vonandi stenst 1.ágúst ennþá.

Fótboltinn upp og niður, mikið niður um helgina þannig að við þurfum núna að girða okkur í brók ÍR-ingar.

Allavega, byrjum smátt í dag, en verðum kannski heimspekilegir fljótlega..........

Mínir fáu hundtryggu lesendur!

Loksins get ég lekið því sem lengi hefur staðið til.  Við Helga höfum tekið ákvörðun um það að flytja fjölskylduna okkar á Snæfellsnes, nánar tiltekið í Snæfellsbæ.

Þar tek ég við starfi skólastjóra Grunnskólans sem hefur 3 starfsstöðvar, í Ólafsvík, á Hellissandi og á Lýsuhóli.  Helga Lind fer að vinna við Framhaldsskóla Snæfellinga á Grundarfirði.

Þessi ákvörðun hefur verið lengi í bígerð, okkur hefur lengi langað aftur út á land, til að komast úr því tímaleysi og þeim hraða sem einkennir allt líf okkar hér.

Að fá tækifæri til að flytjast á jafn stórkostlegt svæði og vestanvert Snæfellsnes er og eiga kost á því að hafa áhrif á það umhverfi var fullkomið tækifæri sem við höfum nú gripið báðum höndum.

Við hlökkum óstjórnlega mikið til að setjast að á Hellissandi í ágúst og bjóðum hér með öllum vinum og kunningjum að koma og kíkja í kaffi þangað.  Heimilisfang auglýst síðar, þegar það er endanlega klárt!

Maggi.

Hæhó.

Jæja, styttist í samræmdu prófin, með sorgum sínum og gleði!  Alltaf soldið skrýtinn tími þegar þessir indælu skjólstæðingar manns leggja af stað í ansi stóran áfanga, sem þó er nú sennilega ofmetinn.

Skipulagsvinna fyrir næsta vetur að hefjast, það er líka skemmtilegt verkefni.  Semsagt skemmtilegur tími í vinnunni!

Reyndar einn mínus, kemst ekki í óvissuferð starfsfólksins 5.maí, þarf að fara með liðinu mínu á hinn mýstíska stað Hellissand að æfa og spila við Víkinga frá Ólafsvík.

Svona er það, bara vinna, lítil gleði!

Maggi.

Halló.

Vikan frekar tíðindalítil.  Sigríður Birta búin að vera veik frá á mánudag þannig að útlit er fyrir að fjölskylduferðin til Akureyrar detti uppfyrir.  Fúlt!  Ætluðum á skíði og annað skemmtilegt en núna stefnir í heimahelgi.

Gætu komið tíðindi fljótlega þó, mikið að brjótast um í höfðum okkar Helgu Lindar sem gæti þýtt breytingar á högum fjölskyldunnar.

Annars rólegt, boltinn ekki að byrja alveg strax, samræmdu prófin ekki í gangi núna og bara smúþþ seiling.....

Maggi.

Hæ.

Frá því síðast hefur ýmislegt gengið á.  Fyrst var að nefna skíðaferð í Bláfjöll með Breiðholtsskóla, án skíðaiðkunar þó!  Starfsmenn svæðisins skamm, skamm!

Vinnan var dugleg í því að taka af manni tímann!  Það má segja að síðustu dagar fyrir páskafrí hafi verið afar uppteknir af því að undirbúa samræmd próf, ganga frá tímum og finna fundi fyrir þau börn og forráðamenn sem þurfti að funda með

Páskafríið fór svo að stórum hluta í Danmerkurferð okkar ÍR-inga.  Flugum út 10.apríl og tókum rútu til Stoholm á Jótlandi, rétt hjá Viborg.  Ferðin heppnaðist mjög vel í alla staði, vellirnir reyndar eins og íslenskir vorvellir, en það var það sem ég vildi!  Stutt á vellina og matur og svefnaðstaða til fyrirmyndar.  Dagur í Kaupmannahöfn var svo skreytingin á kökunni!  Þann dag varð ég 35 ára, 14.apríl.  Fékk að sjálfsögðu dónalega afmælisgjöf frá strákunum!  Heimferðin fín og ég lenti beint í fermingarundirbúningi.

Fermingardagurinn í gær var svo frábær í alla staði.  Thelma glæsilegri en nokkru sinni fyrr.  Presturinn var með góða ræðu sem fjallaði um hve gott fólk unglingar væru.  Of sjaldan talað um þá staðreynd!  Veislan heppnaðist vel, Sigurjón kokkur er náttúrulega snillingur!  Jenný kom og hjálpaði okkur við eldhússtörfin.  Þeim skuldum við stóra greiða og kunnum miklar þakkir fyrir.

Fjölskyldur Thelmu stormuðu til að gleðja hana, mér fannst ánægja og gleði svífa yfir öllu sem gerðist og Guð blikkaði til okkar sólargeislum til að fullkomna verkið.  Takk allir fyrir frábæran dag!

Maggi.